این آئی اے نے علیحدگی پسندوں کے خلاف تحقیقات شروع کردی

قومی تحقیقاتی ایجنسی (این آئی اے ) نے کشمیری علیحدگی پسندوں کی جانب سے وادی کشمیر میں تخریبی سرگرمیوں کی انجام دہی کے لئے پاکستان سے مبینہ طور پر رقومات حاصل کرنے کے معاملے کی تحقیقات شروع کردی ہے۔این آئی اے نے علیحدگی پسند رہنماؤں بشمول حریت کانفرنس (گ) چیئرمین سید علی گیلانی، نیشنل فرنٹ سربراہ و حریت (گ) لیڈر نعیم احمد خان، لبریشن فرنٹ (آر) چیئرمین



فاروق احمد ڈار عرف بٹہ کراٹے اور تحریک حریت لیڈر غازی جاوید بابا کے خلاف باضابطہ طور پر مقدمات درج کرلئے ہیں۔یہ مقدمات کچھ علیحدگی پسند راہنماؤں بالخصوص نعیم احمد خان کی جانب سے نئی دہلی سے چلنے والی ایک نجی نیوز چینل کے سٹنگ آپریشن کے دوران وادی میں پتھراؤ، املاک کو نقصان اور سیکورٹی فورسز پر حملوں کے لئے پاکستان سے رقومات حاصل کرنے کے اعتراف کے بعد درج کئے گئے ہیں۔